🚨Entama la campaña nos barrios de La Suiza
📌Vamos a Cimavilla
📅Xueves 13, 18:15, charra na Casa’l Chinu
📅Vienres 14, 20:30, Pasucais
🟠Lleva la to camiseta
Asamblea vienres 7 d’abril, a les 18.00 hores na Casa’l Pueblu (Cai Llanes, 11, Xixón)
El pasáu martes, 4 d’abril, presentóse ante un centenar de persones el grupu de sofitu a les 6 de La Suiza nel salón d’actos de la Casa Sindical de Xixón.
Son seis persones condergaes a tres años y mediu de prisión y al pagu d’una indemnización de 150.000€ (90.000€ en conceutu de daños morales a un empresariu y los sos familiares: muyer y dos fíos, mayores d’edá) pola so implicación, en distintu grau, nel conflictu sindical que caltuvo la CNT cola Pastelería La Suiza. Una d’elles ye la propia trabayadora, que nun llegó a participar na campaña de denuncia por mor del so estáu de salú, colo que s’enfrenta a una pena de prisión de tres años y mediu pol simple fechu d’acudir a un sindicatu.
Esti conflictu formó parte d’una riestra de lluches nel sector de la hostelería y del pequeñu comerciu que se veníen dando en Xixón dende unos años atrás. El conflictu desarrollóse dientro de la normalidá per aciu de concentraciones –vixilaes de cerca por Policía Nacional y Local- delantre de la pastelería pa denunciar el casu.
Dende l’entamu, l’empresariu y la so familia empecipiaron una campaña de lawfare que consistió nuna lluvia de denuncies colos fundamentos más tolexos, denuncies que fueron desestimaes de contino, hasta qu’una d’elles prosperó al dase les condiciones afayadices.
Un añu dempués de la presentación d’un recursu de casación ante’l Tribunal Supremo, les 6 de La Suiza siguen esperando la so resolución.
Ye un conceyu xunitariu nel que nos afayamos persones que queremos amosar la nuesa solidaridá y el nuesu apoyu a les seis condergaes, y nel que plantegamos en común la defensa de los derechos civiles.
Dende’l grupu de sofitu trabayamos anguaño en dos llínees d’actuación: la denuncia pública del casu y los cuidaos a les condenaes y al so entornu.
El grupu presentó la so primer movilización pública, que consistirá nuna charra na Asociación de Vecinos Gigia, del barriu de Cimavilla de Xixón, y nun pasucais pel mesmu barriu.
La charra tendrá llugar na Casa del Chinu’l próximu xueves 13 d’abril de 2023, a les 18.15h y el pasucais va a salir de la Plaza de la Soledá un día más tarde, el vienres 14 a les 20.30h.
Nel terrén de les redes sociales, el grupu presentó la web https://6delasuiza.info, na que se dará información al rodiu del casu, de nueves convocatories y de campañes específiques pa redes, como #ArtePoles6, un llamáu a artistes de cualesquier disciplina a realizar obres d’arte inspiraes nes 6 de La Suiza y a espardiles baxo’l citáu hashtag.
Ente les numberoses persones qu’amosaron el so apoyu ya implicación nel grupu de sofitu, el cantautor y activista Nacho Vegas destacó la importancia de los cuidaos coleutivos pa, más allá de demostrar la solidaridá y el apoyu mutuu, fortalecenos pa plantegar les lluchas por un mundu meyor. Tamién citó dellos casos de recién que comparten el marcu de represión a la organización popular y los derechos civiles más básicos.
“Equí nos tienen, hasta que faiga falta vamos a apoyar a les seis compañeres sindicalistes que s’enfrenten a tantos años de cárcel y vamos glayar qu’anque nos quieran en soledá, van tenenos en común”
Pela so parte, el historiador Rubén Vega, especializáu nel movimientu obreru, reflexonó sobre’l fechu de que, inda aceptando los argumentos de l’acusación, la desproporción de la pena ye escandalosa y frutu d’una xusticia clasista que castiga con más fuercia a les personas más débiles, criminalizando la solidaridá ente los desposeíos. Destacó qu’el motivu pol que seisi compañeraes se movilizaron nunca foi la persecución de nengún porgüeyu personal, sinón la fidelidá a unes idees y la pura solidaridá. Apelló a la responsabilidá coleutiva d’arropar a quien, agora y nel futuru, entame una llucha polos derechos compartíos.
“Asistimos a una criminalización de los actos de solidaridá qu’apunta nuna direición de perda de calidá democrática y de llibertaes que va en detrimentu de toes nosotres. Si nun defendemos los drechos, va a pasanos factura; cuando defendemos a les 6 de La Suiza, defendémonos a nosotres mismes.”
Manuel Terán, históricu sindicalista de Duro Felguera, tamién superviviente de la represión sindical orquestada dende l’Estaú y los sos instrumentos, anició la so intervención analizando la sentencia y la desproporción de la conderga como una clara intención exemplarizante pa frenar l’actividad sindical que se venía produciendo nun sector mui castigáu, con resultados modestos y, por embargu, inéditos.
Enmarcó esta acción represiva nuna socesión d’ataques a la organización horizontal que espierta con fuercia nos años 70 y que vivió de primer mano nel conflictu de Duro Felguera, nel que la constante llucha coleutiva y la unidá popular consiguieron evitar la represión a la práutica sindicalista horizontal y asamblearia.
“Los trabayadores de les empreses del IBEX 35 o empreses grandes pueden tar más o menos bien representaos, pero la gran parte de la pirámide de los trabayadores non. Y necesiten esi sindicalismu de base combativu y asambleariu, que ye l’únicu que pue representalos y l’únicu que pue ayudalos (…) Y la xente de La Suiza nun ta faciendo otra cosa distinta. Y ehí ye onde tenemos de tar porque ye un retu pa toos.”
Tamién tomó la pallabra Ana Carpintero, con una trayeutoria sindical reconocida. Participó nel conflictu llaboral que tuvo llugar en Xixón na fábrica de camises IKE. Esa llucha, como la que nos ocupa, foi protagonizada por muyeres. Nun análisis comparativu de movilizaciones y represión dende los años 80 hasta’l presente, destacó la creciente perda de llibertaes y l’aumentu continuu de la represión.
“Fuimos p’atrás y tenemos que reforzanos y dir adelantre. Y ye’l sentíu que tien, yo creo, esti actu, arropar a les compañeres. Ya veis qué delitu cometieron y cómo lu pueden pagar con cárcele.”
Como Ana, la so compañera Lola llamó l’atención sobre los efeutos de la Llei Mordaza y la so aplicación interesada pa reprimir al sindicalismu, y valoró la importancia de la llucha coleutiva
p’amenorgar les sos consecuencies.
Por último, Luara Chao, una de les seis sindicalistas condergaes a prisión, agradeció’l calor de les persones qu’ellí s’alcontraben y añadió a lo espuesto poles sos compañeras de mesa la importante carga de xéneru que tien tol casu: dende la circunstancia que lu desendolcó, la denuncia d’una trabayadora pol tratu vexatoriu sufríu durante’l so embaranzu de riesgu, hasta les consecuencies represives, que afeuten sobre manera a muyeres.
“Munchísimes gracies por acompañanos; nosotres vamos a siguir lluchando con esto, porque facer sindicalismu nun pue ser delitu, porque volveríamos a facelo, porque nun nos arrepentimos d’acompañar y d’apoyar a una compañera y asina seguiremos faciéndolo.”
L’actu finó con un emotivu aplausu, una semeya en común y les dos próximes convocatories del grupu de sofitu en perspeutiva: la charra na Casa del Chinu’l xueves 13 d’abril a les 18.15h
y el pasucais per Cimavilla’l vienres 14 a les 20.30h. Pa contautar col grupu de sofitu, puedes escribir a sofitu@6delasuiza.info
📢 Invitación a la rueda de prensa: Grupu de sofitu a les 6 de la Suiza 📢
📍 Salón d’Actos de la Casa Sindical de Xixón
🗓 Martes 4 d’abril, 11:30h
Convidámosvos a la presentación del Grupu de sofitu a les 6 de la Suiza, una iniciativa xunitaria creada pa denunciar el casu de les condenaes pol casu de la pastelería La Suiza y amosar sofitu a les afectaes pola represión. Estes muyeres enfrenten penes de prisión y multes esorbitantes pola so llucha por condiciones llaborales xustes y l’exerciciu de la so llibertá sindical.
Na rueda de prensa, analizaremos abreviadamente’l casu, presentaremos la creación del Grupu de sofitu y la campaña de denuncia planeada. Pa más información, visita 6delasuiza.info.
🤝 Contamos cola to presencia p’arrodiar a les condenaes y amosar solidaridá nesta importante causa. Xuntes, podemos puxar les nueses voces y lluchar pola xusticia y los derechos fundamentales.
✊🏽FOLIXA 1 MAYU✊🏽
30 abril 16:00 Cimavilla
Raztinger | Euskalherria
Peligro 66 | Madrid
Atorrak | Zaragoza
6 Riales | Asturies
Coru Antifascista Al Altu la Lleva | Asturies
Bono solidariu 10€
Fila cero (FSOF):
ES97 3025 0021 4314 0000 5575
Barra con precios populares
Más info: 984 511 668
¡La solidaridá ye la ternura de los pueblos!
📢🗓Convocatoria especial pal nuesu próximu conceyu del Grupu de Sofitu a Les 6 de La Suiza enantes d’entamar la campañona.
📍Ú: Casa’l Pueblu (Cai Llanes, 11, Xixón)
📅Cuándo: Vienres, 31 de marzu a les 19:00 h.
El grupu de sofitu a Les 6 de La Suiza ye una iniciativa xunitaria de rempuesta a la represión y de solidaridá. Nesti conceyu definiremos la nuesa estratexa y aiciones conxuntes en sofitu a Les 6 de La Suiza. Sabemos que sois munches les que sentís solidaridá col casu, pero nun tuvistis la oportunidá d’averavos. ¡Agora ye’l momentu!
Queremos recordavos que la llucha de Les 6 de La Suiza nun ye namái por elles, sinón por toes nosotres y los nuesos derechos fundamentales. Ye hora de llevantar les nueses voces y amosar que nun permitiremos que se pisen los nuesos derechos. ¡Necesitamos a caúna de vosotres nesta llucha!
💪🤝Amás, sedrá una oportunidá escelente pa conocer a otros compañeros y compañeres que comparten les nueses moliciones y valores. Xuntes, deprenderemos y creceremos mentanto construyimos una comunidá fuerte y solidaria.
📣🌟Nesti conceyu, tamién presentaremos el plan d’aición pa la nuesa campaña y discutiremos les próximes movilizaciones. ¡La to voz y les tos idees son fundamentales pal ésitu de les nueses aiciones!
Nun escaezas convidar a los tos amigos, familiares y compañeros de trabayu que tamién quieran xunise a esta causa. Cuantes más persones seyamos, más fuercia tendremos pa lluchar pola xusticia, amosar solidaridá y defender los derechos fundamentales.
¡Contamos contigo! Nun dexes pasar la oportunidá de ser parte d’un movimientu que defiende los derechos de toes.
¡Esperámoste!
Asamblea del Grupu de sofitu a les compañeres del “Casu la Suiza”.
Miércoles 22 de marzu de 2023 a les 18.30 hores.
Casa’l Pueblu. Cai Llanes 11
·Xixón·
Va cinco años vía la lluz una operación represiva xestada nes cloaques del Estáu. Ocho persones yeren condergaes a tres años y mediu de prisión y 150.000 € d’indemnización a un empresariu por participar nuna campaña sindical contra la Pastelería La Suiza, en Xixón.
Tamos ante un ataque frontal a la organización popular pola defensa de los derechos. Los únicos actos condergaos son amosar la solidaridá nuna concentración y exercer la llibertá sindical. Nin siquiera se molestaron, como n’otros montaxes, n’inventar supuestes aiciones violentes que facilitaren la xustificación social de la represión. Toles concentraciones del conflictu desendolcáronse con normalidá, baxo l’atenta mirada policial y munches, incluso cola Delegación de Gobiernu informada de la so celebración.
Policía, medios de comunicación y xudicatura trabayaron de la mano pa poner frenu a una semiente qu’entamara a espoxigar fai años en Xixón. Nesta ciudá, la CNT, col sofitu de cientos de persones axenes a la organización, plantegó -y, na so mayoría, ganó- n’apenes unos años más de trenta conflictos sindicales, enmarcaos nos sectores más precarizaos y con mayor indefensión pa la clase trabayadora: la hostelería y el pequeñu comerciu.
Fueron conflictos de mínimos (respetar el conveniu, abonar salarios…) que s’emprobaron cola llóxica sindical del apoyu mutuu y la denuncia pública. Nun sector nel que’l respetu a la más básica llexislación brillaba pola so ausencia, la patronal asturiana vía cómo emprencipiaben a surdir respuestes que cuestionaben la so posición d’abusu.
El statu quo nun tardó en mover los sos filos. Entamaron les campañes mediátiques de desprestixu, les agresiones, les amenaces policiales y, a la fin, una riestra de denuncies estrafalaries que diben siendo desestimaes hasta qu’una cayó nel xulgáu oportunu.
Cinco años dempués, tres pasar pol TSJA (órganu que confirmó la sentencia a seis de les ocho condergaes), les compañeres tán a la espera de la resolución del Tribunal Supremu del recursu presentáu pola defensa. Si’l TS nun aceptare revisar el casu, la entrada na cárcel de les nueses compañeres taría en manos del mesmu xuez que les condergó en primer instancia.
Too esto va más allá de la solidariadá coles que lluchen y son reprimíes; trátase tamién d’una llucha pol nuesu futuru, pola nuesa capacidá de defensa nos años que tán por venir. Esta sentencia criminaliza la fórmula que les persones trabayadores lleven emplegando dende l’alborecer de les xuniones sindicales: la denuncia pública de les condiciones de trabayu y el llamáu al boicó escontra les empreses que nun respeten los derechos llaborales. Dos ferramientes básiques, que necesitaremos pa defendenos de los abusos empresariales y pa siguir caminando nesti sieglo XXI, son castigaes de manera embullada como actos criminales.
Poro, nuna Asturies que conoz bien les monedes de dos cares (la de llucha y la represión, pero tamién la de la represión y la solidaridá), sentimos la necesidá d’actuar en defensa propia. En defensa de les nueses compañeres, por supuestu, pero igualmente del nuesu derechu a la llucha, al apoyu mutuu, a la organización de les persones esplotaes frente a les esplotadores. Y en defensa del valoratible heriedu que tantes xeneraciones nos dexaron gracies al so inxeniu, a la so llucha, a los sos sacrificios, a les sos victories y a les sos derrotes.
Convocamos a toles persones que se sientan apellaes pa venos. Venos pa (re)construyir comunidá, pa texer redes que nos ayuden a defender tolos derechos que nos quieren pisar. Y vamos facelo de la meyor forma na que se puen defender los derechos: exerciéndolos.
Porque si la so represión nos parte en dos, la nuesa solidarídá nos multiplica.
Asturianu
Català
English
Castellano