UNA ANTORCHADA POLES 6

Esta nuechi de San Xuan hebio dos tipos de fueu en Xixón. A la tradicional foguera precedió un poderosu fueu pa desixir la llibertá de Les 6 de La Suiza.
200 persones entamaron esta nuechi una antorchada solidaria coles 6 de La Suiza. Una llarga cadena humana con bengales espardióse dende la punta Liquerique (n’El Muelle) fasta l’Eloxu l’Horizonte (na Atalaya).

Minutos enantes de la medianuechi y ente miles de presones qu’esperaben la cellebración de la foguera San Xuan, una gran llaparada solidaria camudó’l “skyline” marítimu de Xixón, con un prendíu d’antorches qu’allumó la nuechi la
ciudá. Esta lluminosa aición vindicativa foi organizada pol grupu Sofitu a Les 6 de La Suiza, pa desixir la llibertá de les seyes sindicalistes condergaes nesti casu, a les que’l Xulgáu lo Penal nº 1 de Xixón ñegó la suspensión de la pena de prisión,
de tres años y mediu, magar que la Fiscalía yera favoratible a ello.

Trátase d’una trabayadora de la Pastelería La Suiza y de cinco sindicalistes que se solidarizaron con ella, denunciando que la situación d’esplotación llaboral punxo en riesgu ciertu’l so embarazu.

Sicasí, l’allianza escontra los intereses de la clas trabayadora texía por empresarios, policíes, xudicatura y casta política, consiguió que’l Tribunal Supremu, frañendo los drechos sindicales vixentes, equiparare la demanda de negociación sindical con un delitu de torgues a la xusticia, y la convocatoria concentraciones con un delitu coaciones.

Con esta regresión, contraria mesmamente a la llexisllación vixente, ta tensionándose fasta llendes incaltenibles la paciencia de la clas trabayadora, que demanda calces llegales perafitaos y eficaces pa la negociación social y la llucha
escontra la esplotación llaboral.

El grupu Sofitu a Les 6 de La Suiza entamó esta aición pa dexar ñidio que facer sindicalismu nun ye delitu y p’amosar que les compañeres condergaes nun van tar soles enxamás. El grupu Sofitu lleva cuasi ocho años defendiendo la
inocencia d’estes compañeres y denunciando que’l so procesamientu xudicial nun ye más qu’un intentu xabaz de crimininalización del sindicalismu.

Esti actu foi tamién un llamáu a participar nel manifestamientu que toles organizaciones sindicales asturianes convoquen el 29 de xunu, a les 12:30h, nel Paséu Begoña, Xixón, pa desixir la llibertá de Les 6 de La Suiza y que’l Gobiernu
conceda l’indultu que les llibre d’una sentencia inxusta.

¡6 de La Suiza, llibertá!