Asturianu
Català
English
Castellano
Finó la campaña de financiación popular entamada pola CNT y el grupu Sofitu a Les 6 de La Suiza. La valoración ye, más que positiva, emocionante, porque foi toa una amuesa pal poder y los sos preseos de represión de que la solidaridá de la clas
trabayaora ye una ferramienta viva y poderosa. Donaciones de persones y organizaciones de llugares y sensibilidaes estremaos dieron llugar a un fondu de más de 95.000 €, col qu’atender gastos llegales, sanciones y, en parte, les consecuencies que tien la represión sobro les condiciones de vida de les condergaes.
Van yá cuasi ocho años de persecución policial y xudicial, de sentencies inxustes con sanciones y penes de prisión pa seyes compañeres, namái por defender los drechos llaborales y exercer los drechos sindicales que reconocen les propies lleis del sistema.
Pronto se xeneró, n’Asturies y fora d’ella, un gran movimientu popular de defensa d’estes compañeres y de los drechos de toos. La collaboración xeneral fizo posible que’l casu de Les 6 de La Suiza seya preba incontestable de que l’Estáu español sigue valiéndose de los preseos represivos de siempres pa torgar la llucha de la clas trabayadora, fasta un puntu talu qu’invalida poder falar de réxime democráticu.
Pero p’atender les repersuciones económiques de la represión yera imprescindible una rempuesta popular importante. Y acaba dase. Ñidiamente. La solidaridá obrera acaba de tresmitir a cada condergada la seguranza de que nun ta sola nin énte la represión nin énte les sos consecuencies. Esi sentimientu, ñacíu del sofitu solidariu, ye impagable. Y permite ver una realidá perafitada: la represión nun va aparar
la llucha de les trabayadores.
Poro, dende’l grupu Sofitu a Les 6 de La Suiza, nun podemos menos que dar les gracies a tola xente que collaboró na defensa d’estes compañeres y na campaña de financiación popular. Persabemos que la so llucha ye la de toes. Pero non por ello amueses de compromisu social como éstes tienen de quedar silenciaes.
Munches gracies. Siguimos xuntes na llucha.
